Plantun de Prouvènço

Pèr coumpara dos planto d'encò nostre

Asperugo procumbens & Lithospermum officinale

Rapeguiéu

Asperugo procumbens

Boraginaceae

Àutri noum : Rapego-man, Rapequiéu.

Noms en français : Râpette, Portefeuille.

Descripcioun :
Lou rapeguiéu (noum generi), trachis dins lis escoumbre e li cast de fedo. Es uno planto ramificado cuberto de péu à crouchet sus li cambo coume li fueio. Li flour, pichouneto, soun d'un blu que tiro sus lou vióulet. Se recounèis subretout emé si fru en boursoun plat e denta ("calice" acreissènt) - vèire li fotò.

Usanço :
Li jóuini fueio soun manjadisso cuecho. Proche dóu bourrage, pèr d'ùni, n'en a li mémis usanço : es uno planto bono contro lou tussi e lou raumas. Lis estùdi d'aro monstron d'ùni prouprieta anti-bateriano e sedativo.

Port : Erbo
Taio : 10 à 60 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Asperugo
Famiho : Boraginaceae

Coulour de la flour : Bluio
Petalo : 5
Ø (o loungour) flour : 3 mm
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun
Abriéu à avoust

Liò : Escoumbre e proche dis oustau - Cast
Estànci : Mesoumediterran à Subaupen
Couroulougi : Paleoutemperado
Ref. sc. : Asperugo procumbens L., 1753

Erbo-di-perlo

Lithospermum officinale

Boraginaceae

Àutri noum : Erbo-de-la-perlo, Erbo-perliero, Tè-perla.

Noms en français : Grémil officinal, Herbe aux perles.

Descripcioun :
Aquelo planto, un pau grando, se recounèis majamen à si fru blanc qu'esbrihon coume de perlo. Autramen, quouro flourejo, sèmblo proun à l'erbo-de-la-pisseto, mai èi proun grando, majamen si fueio. Peréu s'atrobo pas dins li mémi relarg.

Usanço :
L'erbo-di-perlo èi couneigudo pèr bèn ajuda à pissa (diuretico). Sougno li graviho dóu ren. Se pren en tisano un cop la planto seco. Servié peréu pèr leva de gran dis iue emé la grano (de bouta souto la parpello de dessouto).